Os servizos de espionaxe tentaron
sabotar a súa chegada masiva tras o Holocausto
EFE
Nos anos inmediatamente
posteriores á Segunda Guerra Mundial, a espionaxe británica preparou e executou
un plan destinado a impedir mediante accións de sabotaxe a chegada masiva a
Palestina de xudeus europeos que sobreviviran ó Holocausto.
Iso é o que conta a primeira
historia autorizada do MI6 -servizo de espionaxe británica-, da que é autor
Keith Jeffery e que comezou a publicar por entregas o diario británico The
Times.
Cara a finais de 1946, o Goberno
británico solicitou o consello do Secret Intelligence Service (SIS) sobre como
disuadir os patróns e as tripulacións dos barcos de transportar ilegalmente a
xudeus a Oriente Medio. Entre as opcións consideradas estaban as de sabotar os
barcos ou as súas reservas de alimentos ou auga potable e ata incendiar os
barcos no porto para culpar logo desas accións a unha organización árabe creada
especialmente para tal fin.
Tras unha reunión celebrada en
febreiro de 1947 entre os SIS e representantes das Forzas Armadas, a Oficina
Colonial e o Foreign Office, o xefe do departamento de enlace deste último
ministerio deulle luz verde ó plan de sabotaxe "a condición de que non
houbese mortes".
Segundo o libro que agora se
publica, durante o verán de 1947 e a comezos do ano seguinte leváronse a cabo
sabotaxes contra cinco barcos en portos italianos: un dos buques deuse por
perdido mentres que outros dous sufriron graves danos.
Nos dous restantes, os
mergulladores descubriron a tempo as minas magnéticas utilizadas.
Para desviar a atención
inventouse unha organización á que bautizaron Defensores da Palestina Árabe,
que foi a que se atribuíu a responsabilidade desas sabotaxes en cartas enviadas
desde París ó primeiro ministro, ó titular do Foreign Office (Ministerio de
Exteriores) e a varios xornais, nas que se implicaba ós soviéticos na
inmigración xudía.
A espionaxe británica considerou
un éxito toda aquela operación, bautizada "Embarrass" (Embarazo),
porque en ningún momento espertou sospeitas sobre a súa orixe e serviu ademais
para disuadir os organizadores xudeus da inmigración ilegal, que deixaron de
confiar nos barcos italianos para o transporte.
POLÍTICA
Sucesores do imperio otomán
Tras a Primeira Guerra Mundial, a Sociedade de Nacións encargoulle ó
Reino Unido a administración de Palestina, que antes pertencía ó imperio
otomán. Os británicos estiveron alí ata maio do 1948.
Ningún comentario:
Publicar un comentario