mércores, 12 de xaneiro de 2011

A historia secuestrada


Manuel Monge denuncia nun libro as consecuencias das mentiras da ditadura e do pacto de silencio da Transición, cun "Estado democrático á defensiva" na política de recuperación de memoria
MARÉ . SANTIAGO
"Levamos máis de trinta anos cunha política equivocada respecto á liquidación dos restos do franquismo. Lembremos que na chamada Transición á democracia tiveron un papel fundamental ministros da Ditadura e persoas vinculadas durante anos ao franquismo". "E así pasa o que pasa. Un Estado democrático á defensiva e unhas organizacións fascistas fachendeando e á ofensiva. Os fillos políticos dos responsábeis de centos de miles de asasinatos -máis de seiscentos na comarca da Coruña- atrévense a sentar no banco dos acusados un xuíz por cometer o "grave delito" de querer investigar os crimes do franquismo". Son algunhas das reflexións coas que o presidente da Comisión pola Recuperación da Memoria Histórica da Coruña, CRMH, Manuel Monge, remata o seu libro A historia secuestrada polo franquismo, editado por Laiovento.
O ensaio comeza lembrando os crimes do franquismo. "A represión franquista asasinou máis de 5.000 persoas en toda Galiza", apunta. Ademais, encadra estes asasinatos na estratexia dos golpistas de, como dixo o xeneral Mola, "eliminar" os que non pensaban coma eles.
Monge salienta tamén a desaparición e adopción ilegal de fillos e fillas dos represaliados, ou os campos de concentración e fosas comúns. Sobre o xuízo contra o xuíz Garzón, subliña que "vivimos mo mundo ao revés: os criminais e verdugos de miles de persoas durante a ditatura franquista, convértense en acusadores dun xuíz que pretende investigar estes crimes. Todo isto ante a pasividade do Goberno, incapaz de ilegalizar organizacións como Falange, que xogaron un papel fundamental na represión franquista e que continúan hoxe facendo apoloxía do fascismo".
O autor repasa despois a traxectoria da CRMH: o seu nacemento tras anos de "defensa numantina" da simboloxía franquista por parte do PSOE de Francisco Vázquez, e as principais actividades, como os roteiros pola retirada dos símbolos franquistas, homenaxes ás vítimas ou campañas como a que lembraba que Sanjurjo foi un golpista.
DATOS
O símbolo do pazo de Meirás
A loita pola devolución ó pobo do pazo de Meirás é un dos temas máis simbólicos da actividade da CRMH. Monge denuncia no seu libro a "compracencia" dun PSOE e dun PP que "presumen" da Transición.
DATOS
O retroceso co Goberno do PP
Sobre a retirada dos símbolos, o autor apunta a como Mar Barcón non apoiou en varias ocasións as mocións neste sentido, e recorda que, malia que no 2009 o Pleno coruñés, coa abstención do PP, aprobou o informe do Comité de Expertos para a retirada dos símbolos, moitos aínda permanecen onde estaban. E analiza eivas da Lei da Memoria Histórica como que non recoñece a anulación dos xuízos franquistas, ou o retroceso no proceso de recuperación da memoria que supuxo a volta do PP ó Goberno galego, tras un impulso do Ano da Memoria, co bipartito.
Aspectos do pasado coruñés
O libro detense, como indica o seu título, en partes da historia que o franquismo negou ou manipulou. Lembra, así, o pasado republicano da cidade, ou que Juan Canalejo foi o fundador da Falanxe na Coruña e organizador dun grupo terrorista ou Millán-Astray un golpista e responsable de Propaganda da Ditadura. O ensaio cuestiona, en xeral, o pacto do silencio da Transición, e en relación con isto acusa a Manuel Fraga de ser "cómplice e partícipe da política represiva" da ditadura nos anos 60 e 70.

Ningún comentario:

Publicar un comentario